💁🏻‍♀️香港人行政書士導讀
芬蘭伯伯諮詢入管法問題
呢個經典個案，我想同大家介紹下。
呢位芬蘭伯伯表示：自己每年 12 月都會嚟日本，仲會帶埋幾隻鹿一齊嚟「工作」。因為停留時間好短，所以一直都係用觀光簽證入境。
工作內容好簡單：
入屋、派禮物、同小朋友互動。
唔收錢，唔開公司，唔簽合約。
但最近日本對外國人嘅在留管理愈嚟愈嚴格，佢開始有啲擔心：
「我咁樣，會唔會其實已經違反入管法？」
😌 我將問題拆成三個層次同佢講清楚。
第一層：伯伯用咩身份入境？
短期滯在（觀光簽證）＝觀光、探親、短期商務活動。
重點唔係你留幾耐，而係你嚟做乜。
第二層：你實際做緊嘅行為係唔係「工作」？
所謂「派禮物」，如果：
→ 有固定時間？
→ 有既定對象？
→ 有清晰社會角色（大家都預期你會嚟？）
→ 仲涉及形象、宣傳、品牌認知？
咁入管睇嘅，未必會同你心目中嘅「義工活動」一樣。
第三層：制度角度點理解「就労」
日本入管法入面嘅「就労」，
→ 唔一定要收錢，
→ 唔一定要打卡，
→ 唔一定要有合約。
只要活動已經超出「一般旅客合理範圍」，而且具備重複性、計劃性、對外展示性，就好容易被判定為資格外活動。
我同佢講得好直接：
「如果你真係每年準時出現、入屋派禮物、仲要全國巡迴，用觀光身份，其實風險唔低。」
伯伯沉默咗一陣，問我：
「咁我係咪應該認真諗下自己嘅在留資格？」
我表示贊成🤪
為咗確保小朋友每年都有禮物收，真係應該好好申請一個適合嘅在留資格。
同埋老實講，下下爆門入屋，其實都有刑事法風險㗎喎，嘖嘖嘖……真係一個亂嚟嘅外國人。仲未計啲鹿周圍痾💩。唉～ 唔知佢有冇虐畜添㗎！
🎅🏻 聖誕老人都會問清楚，大家都唔好掉以輕心喇～
（以上故事純屬虛構🤣）