好長氣

可能我就係屬於果種會發生事端的體質？
對我來說喺日本唔識日文真係唔知點樣生存到。
繼「跌咗信用卡」（有出過post）、「跌親」（好似冇寫過），今次到架車喺雪地卡住🤪
地點：栂池高原スキー場（白馬）
人物：我哋+地頭蟲
長話短說，就係厚雪而地面有高低不平，於是架車卡住。當地人A同我講「根據我經驗，你呢個位係只可以向後甩身㗎」。打電話去租車公司求助，對方話「最快要1個鐘頭先可以派到拖車嚟」。呢個時候行動力爆棚的朋友B開始發揮功能！佢喺附近搵到一架鏟雪車，叫對方嚟幫手。
當地人A同鏟雪車叔叔講「呢個人識日文，可以同佢溝通」。
叔叔確定真係可以用日文溝通之後「我可以幫手拖架車上嚟，但我唔能夠負責後果。如果你哋要有人負責後果，你就最好等租車公司派果架拖車嚟。你唔好誤會，我唔係唔想幫手，只係責任問題。」
我翻譯咗俾同行朋友聽，大家即刻表示🙆🏻‍♀️🙆🏻‍♂️
叔叔都仲係唔放心「拿～我有證人㗎」（指住當地人）。
達成共識之後，當地人即刻幫手搵啱用嘅繩。然後就順利解決（片）
不過事實上係達到呢個解決局面之前，我哋已經由天色光搞到天都黑，我個弱小心肝仲有擔心過有熊出沒🐻。
仲有打電話俾租車公司對方真係超多敬語🤣而且說話真係好花時間
我「你好，我叫（我個名），我喺白馬，架車卡住需要幫忙」
佢「我明白，白馬さん、你喺邊度？」
我「我叫（我個名），我喺白馬嘅栂池」
佢「白馬さん、請問你喺邊度？」
我「…我喺白馬，我叫（我個名）」
對方問咗好多次「我依家收線，安排拖車服務，可以嗎？（でもよろしいでしょうか？）」
港女嘅心聲係「你唔好再問啦！！！你做啦～～～！」
佢仲要再三確認「つがいけ、我查到見到係木字邊做一個母字的，いけ就係普通池湯的池，是這樣寫嗎？」
我「對的（冷靜！不能進一步增加佢壓力）」心聲係「我都係第一日識呢個字㗎咋！！！我外國人嚟㗎～～！」
（港孩mode喺熊出沒的憂慮下全面啟動🤪）
片中紅色箭嘴果個就係我。我仲繼續同租車公司講緊「我地啱啱獲救喇！」
好彩鏟雪車叔叔英勇～而且睇得出好有經驗，我哋呢種外地人盲毛唔知佢會唔會每日都遇到10次🤣
最後佢補充「係呀！你地唔識日文我就唔敢幫手㗎喇！識日文好重要㗎！」
佢喺獲得現場女生英雄式歡呼之後怕怕醜醜咁逃遁。